Pangangadwan tamo a tumuloy magsarita nin Binubulinao pigaw kai ya malingwanan

Say Bituen nan Binubolinao

Siti pa a báyon siksyon nin Patandá. Say naiká iti a patandá a ngibwat sa Pilipinas tan sa sansinakban. Saray mabasa muyo iti ket nagibwat sara sa nagsikabarang nin piryudiko sa Internit tan naipataros sara sa Binubolinao. No main marabay nin mangikalamó ninpatandá sarínen muyon ipapataros tan ipáwit muyo sa Binubolinao.com udino sa Mag´irgo Atamo.

Gawa a Literaryo nin Binubolinao

Saray iti a gawá nin literaryo ket naisurat sara anamana sa pakasuratan nin Binubolinao, say máran nin naisurat ra intaw ket pakasuratan nin Kastilá. Main et gaw´en kunran saray iti nin gawá. Matkap et nin ipaliwanag saray ararem nin Binubolinao tan main et nin gawá nin kai tandá no síno a nanurba udino síno a nanurat. No main malilbian muyo iti nin gawá, manurat kamo pa iti sa Binubolinao.com. Ikalamó et lí saray raruma tan báyo nin gawá. Pinditenmuyo iti nin mako sa Gawa nin Literaryo.

BOLINAO
Sanribo a Taon Sinsaytaw... Sawanin
PISTA'98 BABALIN BOLINAO
(Silibrasyon nin Sintinaryo)
Abril 20-26, 1998

Say tima udino say rabay nay wanan ibaritá kunan sitin kasuratan ket "Pammanemtem sa Limmabas sa Iyaaligwas nan Bolinao." Nasurat ngámin sa Inglis balé ipataros lí sa Binubolinao. Naikalamó saray artikulo bilang sarayti: Bolinao Sanribo a Taon Sinsaytaw, Ibinto nin Nanyadí tan Impurtanti nin pitsa, Bolinao: Tutaon nin 1400-1500 a Pamanabunan, Sin si Bolinao nikunikta nayay Pilipinas sa babon lutá, tan saray raruma et. Ipataros saray iti lí sa Binubolinao. Pinditenmuyo iti nin mako sa Pista '98 Babalin Bolinao.

Si Kristo a Adí
SILIBRASYON
Arkidyusisis nin Lingayen-Dagupan

Nubyimbri 24, 1974
Parukyal nin Santiago | Bolinao, Pangasinan
Prugrama nin Panemteman

Nakit kuyayti nin kasuratan sa Bolinao Musyo sin itaw ako sa Bolinao sa bulan nan Pibraro 2008. Wanan sitin prugrama, main kano a Pista nin Si Kristo a Adí nin tinaun-taon a mangyadí. Saray mumunisipyo magrisibiran sara kunan sitin ibinto ket sa taon nan 1974, si munisipyo nin Bolinao a nakarisibiran.

Main sikyon nan prugrama a Bolinao Siksyon. Naikalamó saray kurido, berso, manurba nin kansyon, balitok a saritá tan talimbukaya. Mákit iti saray umnu-umnoy máran gawá nin literaryo a nangibwat sa Bolinao. Naikalamó saray literaryo bilang sara si Tomas Calado, si Simon del Fierro, si Pelagio De Perio, tan saray raruma et.

Siti e a núnan saritá:

Bolinao Siksyon

Paúnan Saritá

Si Bolinao, bagyá man wadí ta makabos yan babali tan adayó ya sa butlay paningkapan kadunungan ta iti yayna sa sudot nan prubinsyan Pangasinan, main yan dirin saritá a irangas nin magawá kiuribay sa animan a saritá sa sansinakban. Saray gindat a tutawudti kunan sitin babali, baná sa pangangawánan ra kunan sitin babali tan lalun-laluyna kunan diri ran saritá a Binubolinao, kanyá sinulitan ran makabatí nin peteg a saritá nin Binubolinao pigaw main tawiren ran mantubo a kababalian ra. Udet, sinulitas ran manurat kurido, berso, tan manurba nin kansyon. Saraytin peteg a tawir nin kasan kapada tan nepeg kawánanen nin barang sinusása nin taga Bolinao.

Natuloy sa Bolinao Siksyon.

Saray raruman siksyon ket naisurat sa Inglis. Mampaipataros et sa Binubolinao.