Malamang

Ni Don Simon Del Fierro

Malino kan sarming a kinawa-kawánan
Ni ilag-ilag kon andí kumon sawaan
Kaban a balitok, mutyá a piaduan
Pinasak ilalo, sinanlaan byay.

Ayi naytaw kadí say miunano kasamba
A byay moy adó ko liwa-liwa kata
Tinaksi (Sinaksi) moy langit tan miglot a byay
Tan bukod patiti makapanyay kunta.

Linmambot sa kerep a nibin ilalo
No kikápusan koy adó tan labi ko
Ta kai inilag a daltay tinggas mo
Nin kuntran samal sa pangangadó ko.

Alaki tin dusa alaki tin dyá-dyá
Nangiyadi sa byay ko narate nin karmá
Nangmula kon adó pigaw no sumawá
Mamutin ririket, ket ginmungan luwá.

Mayin ket kai mo nisiblet sin núna
No ibi mon lamang payti sa raruma
A palson adó inilaluwan kuyna
A ikon kon bukod sa bilang mon samba.

Adti naytaw kadí sa adó, lugod mo tan labi
A barang imis mo inso kon alaki
Ay! Na ay byay ko, adti moy na nibi.

No main kan sakit o rere kanakman
Múna kon malipos nin kukaberengan
Barang turó a luwá mo marirab kon punyal
Tan barang saw´et mo ikauyos nin byay.

Ginurutan mo man a adó ko kumo
Kai ko sangitan dapot lí mákit ko
A sumawá kan riga sa inadó mon báyo
Tan kawánanen nakon bilang nipangawánan ko.

• • • • • •

ODOSIA

Ni Don Simon del Fierro

O diamantin pusó a kai lumumo
Sa madta dyan apoy a kaiibeg ko
Ípos mo may pait pangungurá mo
Itumang koy sam´it pangangadó ko.

Dyá-dyá may maraté apaynan apa
O bungan ilalo ta sipud matata
Dublyan koy sulit iruros a sansya
Wá main mitawir mibaló tumua.

O ta sínoy manpipas´an bereng
A andí magdyá-dyá no kawkulanen
Sa man´ibegan kon no wadí ta kanen
Anroy nan panaon a man´inam-inamen.

Say mansakyen kasan mantubuyan pwirto
A kapadan pubrin pásar ko
Sung-song man sa agos tan rat´anan bagyo
Ípos koy ibeg ta syay nay anggawan ko.

Ikamin koy ibeg ta ikwa kon gaod
Sa pananaki kon sumung-song sa agos
Ibugsay koy iliw tan itken koy anos
Wá lamang kumon karmaen mi luob.

Alaki may ilalo kai ka magámuran
Ípos koy adó ta ipalamang-lamang
Wá ka malingon bigrá mon malingay
A man´ay-ay kumon pusó a pabyay-byay.